Новиот анимиран филм „Звуците на Новата година“ од „Светот на Биби“ ќе ја има својата премиера вечерва во повеќе киносали низ Македонија. Филмот ќе се прикажува во киносалите „Синеплекс“ и „Милениум“, но исто така „Звуците на Новата година“ ќе патуваат низ цела Македонија и тоа: „3Д Кино“ – Битола (21, 22, 25 и 27 декември), „Мис Стон“ – Прилеп (22 декември), Дом на култура Гевгелија (23 декември), Дом на култура Свети Николе (21, 22 и 25 декември), Дом на култура Пробиштип (26 декември), Центар за култура Кичево (21 декември), Дом на култура Богданци (25 декември), „Киноверзум“ – Штип, Велес и Свети Николе (21 декември), Дом на култура Охрид (29 декември), Дом на култура Крушево (21 декември), Дом на култура Демир Хисар (21 декември), Кино „Манаки“ – Битола (22, 23 и 24 декември).
Детската фантазија и искреност се непроценливи и токму поради истото се одлични судии, точно знаат што им се допаѓа, а што не. Кога нешто е добро, веднаш препознаваат и со уживање се препуштаат кон нови авантури. „Светот на Биби“ е дел од светот на секое детенце и веќе неколку години по ред на забавен начин преку едукација и интерактивност ги води низ целиот универзум на Биби и Боби.
Во цртаниот филм ќе дознаете што се случува со звуците на Новата година. Зошто ниедна мелодија не е како што треба и зошто се испревртени зборовите во сите песни на светот? На светот? Подобро речете – во целата бесконечна вселена. Но, ако мислевте дека нема кој да го реши проблемот – погрешивте. Биби, Боби, снешкото Гого, Дедо Мраз од Заз, роботчето Р1, но и мистериозните чувари на Заз се обединуваат да ја спасат целата музика во универзумот.
Режисери на филмот се Димитар Аризанов и Јосип Здравковски, гласовите ги позајмуваат актерите: Слаѓана Вујошевиќ, Сашко Коцев, Никола Ристановски, Сашка Димитровска и Дамјан Цветановски, а за музиката се погрижи Ангел Ќосев.
Исто така, за претстојните викенди (23, 24, 30 и 31 декември) со почеток од 12 до 16 часот пред киносалата „Синеплекс“, тимот на „Светот на Биби“ подготви бесплатни IQUP работилници со детски друштвени игри, научни експерименти и уште многу други изненадувања.
